გავრცელებული სტერეოტიპების მეშვეობით, ბევრისთვის ამერიკის იერსახე, სხვა მრავალ ასპექტთან ერთად, სწრაფი კვების და ჰამბურგერების ასოციაციას იწვევს, იტალიის – პიცისა და პასტის, ინდოეთის – კარისა და ჩაპატის. მსოფლიო მრავალფეროვან კულტურებს და, შესაბამისად, მრავალფეროვან სამზარეულოებს იცნობს, მაგრამ, ამ მრავალფეროვნების ფონზე, პლანეტის ბევრი წერტილის მცხოვრებლებს კვების ერთი გამორჩეული კულტურა – ვეგეტარიანელობა აერთიანებთ.
კვების ეს სპეციფიკური და გლობალურად გავრცელებული მეთოდი საქართველოშიც შემოდის და, მიუხედავად იმისა, რომ ქართული სამზარეულო მნიშვნელოვნადაა ხორცეულზე ორიენტირებული, ვეგეტარიანელობით სულ უფრო მეტი ადამიანი ინტერესდება. როგორც ვეგეტარიანელები ამბობენ ასეთი ცხოვრების სტილი პირდაპირკავშირშია ადამიანის ჯანმრთელობასთან, სულიერებასთან და ზნეობასთან. ვეგეტარიანელობის ძირითადი პრინციპი ხორცის უარყოფაა. თუმცა კვების ეს მეთოდი სხვადასხვაგვარ ვარიაციებს შეიცავს – არსებობს ვეგეტარიანელობის როგორც მსუბუქი, ისე კიდევ უფრო გამკაცრებული ფორმები. თუ პირველ შემთხვევაში დასაშვებია, მაგალითად, თევზის მიღება, მეორე ფორმა ხორცთან ერთად ნებისმიერ ცხოველურ საკვებს კრძალავს.
მაგრამ ფორმებზე მეტად მრავალფეროვანია ის მიზეზები, რომლებიც ადამიანებს ვეგეტარიანელობის ამა თუ იმ ფორმაზე გადასვლისკენ უბიძგებს. ამ მიზეზებს შორის ფიგურირებს როგორც რელიგიური ფაქტორები, ისე ეკოლოგიური და ეკონომიკური; ზოგჯერ ვეგეტარიანელობას, უპირველესად, ჯანმრთელობაზე ზრუნვით ხსნიან; არანაკლებ მნიშვნელოვანია ცხოველების მიმართ თანაგრძნობა და არაძალადობრიობის პრინციპების გაზიარება.
შენი ქსელი: შენი ექიმი · შენი ამბები
