შოტლანდია პატარა, მაგრამ გამორჩეული ქვეყანაა თავისი კულტურით, სამზარეულოთი თუ ტრადიციული სამოსით. ისინი დიდ პატივს სცემენ საკუთარ ისტორიასა და ფასეულობებს, თუმცა ამ ყველაფერთან ერთად შოტლანდია თავისი ულამაზესი ბუნებითა და არქიტექტურიტაც გამოირჩევა, ამიტომ მას ხშირად ირჩევენ სხვადასხვა ფილმისა თუ სერიალის გადასაღებად.
საკმარისია ვახსენოთ ცნობილი ფილმი „მამაცი გული“. თუმცა ბოლოდროინდელი ფილმებიდან და სერიალებიდან ალბათ ყველაზე ცნობილი სერიალი „აუთლენდერია“, რომელმაც საინტერესო შინაარსთან ერთად თავი შოტლანდიის ლამაზი ხედებითა და ისტორიული ნაგებობებით დაგვამახსოვრა. ჩვენ შესაძლებლობა გვქონდა, პატარა ინტერვიუ ჩაგვეწერა მსახიობ სკოტ კაილისთან, რომელიც წარმოშობით სწორედ შოტლანდიიდანაა და სერიალ „აუთლენდერში“ როსის როლს ასრულებს.
-შოტლანდიური კულტურის რომელ ასპექტებს გამოარჩევდით?
-რაც გავიზარდე, მით უფრო დავაფასე შოტლანდიური კულტურა. ბავშვობაში, ვფიქრობ, სათანადოდ ვერ აფასებ ისეთ რაღაცებს, როგორიც შოტლანდიური მუსიკალური საკრავი ,,ბეგფაიფი” არის, მაგრამ ასაკთან ერთად ვაცნობიერებთ, რომ ის ჩვენი კულტურის ნაწილია.
ბეგფაიფი
-წლების განმავლობაში ჩვენი ქვეყნის სხვადასხვა ღონისძიებებიდან ვისწავლე ისეთი პოპულარული შოტლანდიური საკვებისა და სასმლის დაფასება, როგორიცაა ჰაგი და ვისკი. შოტლანდია შეიძლება პატარა ქვეყანაა, მაგრამ მას დღესაც აქვს მყარი კულტურული ფონი.
შოტლანდიური სამზარეულოს ყველაზე ცნობილი წყვილი, ჰაგი და შოტლანდიური ვისკი.
-როგორ მოხვდით Outlander-ში და თუ შეგიძლიათ აღწეროთ გადაღების პროცესი?
-როსის როლის შესრულებამდე რამდენიმე მოსმენა მქონდა Outlander-ისთვის. ეს იყო გასაოცარი გამოცდილება, რადგან მე შევძელი პირველი სეზონის ყურება მანამ, სანამ მეორე სეზონში თვითონ გავხდებოდი ამ სერიალის ნაწილი.
– როგორები არიან Outlander-ის მთავარი გმირები რეალურ ცხოვრებაში?
-ყველა ძალიან პროფესიონალია და ისინი ყოველთვის საუკეთესო ფორმაში არიან გადასაღებ მოედანზე. მე გამიმართლა, რომ მომეცა საშუალება გამეცნო მსახიობები გადასაღებ მოედანს მიღმაც და მათთან ერთად დავესწარი სხვადასხვა საჯარო და კერძო ღონისძიებას.
ძველი შოტლანდიური ნაგებობები სადაც სერიალს იღებდნენ
–არის თუ არა რაიმე მომავალი პროექტი, რომელში მონაწილეობასაც მოუთმენლად ელით და შეგიძლიათ გაგვიზიაროთ?
-დიახ, 2024/2025 წლებში თეატრალურ გასტროლებზე მივდივარ, რომელიც კვირაში 50-ზე მეტ ადგილას ჩატარდება მთელ ბრიტანეთში, შეგიძლიათ იხილოთ ლინკი: http://www.scottkyle.co.uk
–დაბოლოს, რამეს ხომ არ ეტყოდით Outlander-ის ქართველ მაყურებელს?
-გმადლობთ სერიალის მუდმივი მხარდაჭერისთვის და ვიმედოვნებ, რომ თქვენ კვლავაც იქნებით ჩემი თავგადასავლის ნაწილი როსთან ერთად Outlander-ის ახალ პრიქველში.
ავტორი: გიორგი პაპუაშვილი
შენი ქსელი: შენი ექიმი · შენი ამბები
