კინომცოდნე ნინა კალანდაძე საუბრობს ჟურნალთან “ინტერიერი”:
ჩემი ბინიდან მთელი ქალაქი ხელის გულზე მოსჩანს. ამ ხედების მიხედვით აეწყო ბინის გეგმარება და შემდეგში ინტერიერის დიზაინიც. მეოცე სართულზე მდებარე ბინა – ცაში გამოკიდებული კერძო სახლი ქალაქის თავზე
დიდ ბინას, მოგეხსენებათ, ერთი მინუსი აქვს, სიმყუდროვის ნაკლებობა. არქიტექტორ ბაია ნიკოლაიშვილის სწორი ხედვისა და დაგეგმარების შედეგად, ამ საშიშროებას გვერდი უმტკივნეულოდ ავუარეთ. თუ შეგიძლიათ, წარმოიდგინოთ 560 კვადრატული ფართის მყუდრო სივრცე, ეს ნამდვილად ჩემი ბინაა.
ბაია ჩემი ახლო მეგობარია, რაც აადვილებდა მასთან მუშაობას. დამკვეთსა და არქიტექტორს შორის არსებული კონტაქტი ძალზედ მნიშვნელოვანია, რომ სასურველ შედეგამდე მიხვიდე. დამკვეთის მხრიდან ხშირად არის გარკვეული ტიპის შეზღუდვები, რაც ხელს უშლის არქიტექტორს თუ დიზაინერს საკუთარი პროექტი რეალობად აქციოს. ჩვენს შემთხვევაში, ეს შეზღუდვები მოხსნილი იყო, არა მარტო იმიტომ, რომ მეგობრები ვართ, არამედ იმიტომ, რომ ჩვენი ხედვები ემთხვეოდა ერთმანეთს.
ვთვლი, რომ ბინა საკმაოდ არასტანდარტული და საინტერესო სწორედ დაგეგმარების მხრივ გამოვიდა. სივრცე ზონებად დაიყო, სადაც ძალიან მოსახერხებლად და კომფორტულად განლაგდა საძინებლები და სხვა ოთახები.
მე მინიმალიზმი მიყვარს და ჩემი სახლის ესთეტიკაც მინიმალისტურია. ხშირად მინიმალიზმზე ზედაპირული შეხედულება აქვთ და ეს მიმდინარეობა ბევრისთვის, უბრალოდ, ცივ, თეთრ კედელთან ასოცირდება, რაც რა თქმა უნდა, ასე არ არის. მინიმალიზმი პირველ რიგში აზროვნებაა, ხედვა, რომელიც ყველაზე ახლოს არის ჩემთან. თუმცა მიყვარს მინიმალიზმში
პატარა დისონანსის შეტანა, თანამედროვე ავეჯთან, ვთქვათ, რაიმე სიძველის შერევა დეტალის სახით.
როდესაც უშუალოდ ინტერიერზე გადავედი, აქაც არქიტექტორს ვეკითხებოდი რჩევებს, რადგან სივრცე დიდია და თავისთავად – დამაბნეველი. რა თქმა უნდა, დიზაინს და ესთეტიკურ მხარეს დიდი მნიშვნელობა აქვს, მაგრამ სახლში პირველ რიგში ჩემთვის მთავარი მაინც კომფორტია. ამიტომ ჩემი პრიორიტეტები თავიდანვე მქონდა. ეს იყო კომფორტული სამზარეულო და აბაზანა. ჩემს აბაზანას ფანჯარა აქვს, რომლიდანაც კუსტბაზე იშლება ხედი… ნახატებს რაც შეეხება, ზუსტად ვიცოდი, რომელ კედელზე რომელ ნახატს მივუჩენდი ადგილს. ბევრი ავეჯი ინტერიერში არ მიყვარს. გადატვირთული სივრცეები მღლის. თუმცა ვერ ვიტყვი, რომ ჩემი სახლი ცარიელია. არც მცენარეების დიდი მოყვარული ვარ. შეიძლება ერთ ადგილას მოვუყარო თავი, ისიც ძალიან მცირე რაოდენობით. სამაგიეროდ მიყვარს სხვადასხვანაირი სანათები, ლამფები, ყველა სახის განათება, ვთვლი, რომ განათებას ინტერიერში გადამწყვეტი მნიშვნელობა აქვს.
ხშირად არის, რომ სახლში ნივთებს ადგილს ვუცვლი. ამ ბოლო დროს დავაკვირდი, რომ ეს ჩვევა სეზონურია, განათების ცვლილებასთან არის დაკავშირებული წელიწადის დროების მიხედვით. თუმცა უნდა აღვნიშნო, რომ ბაიასთან ერთად თავიდანვე ყველაფერი იმდენად პროფესიონალურად გაკეთდა და დალაგდა, რომ რა ცვლილებაც არ უნდა შევიტანო, ბოლოს მაინც პირველ საწყისს ვუბრუნდები.
უკვე 7 წელია, აქ ვართ და რაც დრო გადის კიდევ უფრო ვაფასებ, რამდენად სასიამოვნოა, როდესაც ცხოვრობ გარემოში, რომელიც შენთვის ორგანული, ჰარმონიული და ამავე დროს ძალიან კომფორტულია.
#gochadze #drpkhakadze #sheniambebi #sheniinterieri
მასალის გამოყენების პირობები
