ბავშვის ორგანიზმს აქვს უნარი თავად განსაზღვროს, როდის და რამდენი უნდა მიიღოს საკვები. თუმცა, ეს არ ნიშნავს იმას, რომ უფროსებმა ბავშვის მენიუს ყურადღების გარეშე დავტოვოთ
ბავშვი რომ ჯანმრთელი გაიზარდოს და სწორად გავითარდეს აუცილებელია, უზრუნველვყოთ ბალანსირებული კვება და შევადგინოთ რაციონი, რომელიც ყველა საჭირო კომპონენტს მოიცავს.
თუ ბავშვი სკოლის ბუფეტში სხვადასხვა სასუსნავს ყიდულობს, მცირეა შანსი, რომ სახლში დაბრუნებული მადიანად ისადილებს. თუ სადილის შემდეგ მიირთვა სასუსნავი, ეს აუცილებლად გავლენას მოახდენს ვახშამზე. ამის თავიდან აცილების მიზნით, სასურველია, ნამცხვრები, კანფეტები და ჩიფსები ბავშვის მენიუში იშვიათად იყოს. მათი ადგილი უკეთესია ხილმა ჩაანაცვლოს, რადგან ხილი სწრაფად გადამუშავდება, მოკლე ხნით აძლევს სიმაძღრის შეგრძნებას და გაცილებით სასარგებლოა, ვიდრე ცომეული და ტკბილეული.
ვითარება რთულდება, როცა ბავშვი ბიორიტმით ბუების კატეგორიას ეკუთვნის. მისი საჭმლის მომნელებელი სისტემა გვიან “იღვიძებს” და დილით, საუზმის დროს, ბავშვს მადა საერთოდ არ აქვს. ამ შემთხვევაში მას შეიძლება შევთავაზოთ იოგურტი ან ჯემიანი პური.
პატარები ხშირად ამბობენ უარს ფაფაზე. არც ესაა გასაკვირი, მეტადრე – თუ ყოველ დილა-საღამოს ვაჭმევთ. ისღა დაგვრჩენია, მეტი ფანტაზია გამოვიჩინოთ.
როცა ბავშვი მთელი დღე არაფერს ჭამს, ეს საკმაო საფუძველია დასაფიქრებლად და, შესაძლოა, ექიმთან მისასვლელადაც კი. საბედნიეროდ “არაფერს ჭამს” უმეტესად არა რეალობა, არამედ უფროსების აღქმაა. როცა ასეთი ბავშვების დღიურ რაციონს განვიხილავთ, აღმოჩნდება, რომ მათ მიერ მიღებული კალორიების რაოდენობა აღემატება კიდეც ნორმას. ნამცხვარი, კანფეტი, ფუნთუშა, წვენი თუ ლიმონათი – ეს ყველაფერი ენერგიის წყაროა.
რატომ არ არის რეკომენდებული ძალდატანება
რასაკვირველია, უფროსებს შესწევთ ძალა, ბავშვებს ჭამა აიძულონ, მაგრამ დროთა განმავლობაში ეს ხელს შეუწყობს საკვებისადმი ნეგატიური დამოკიდებულების ჩამოყალიბებას და საბოლოოდ შესაძლოა ნერვულ აშლილობამდე და კვების დარღვევამდეც მიგვიყვანოს.
გაიგეთ მეტი ჩვენს ტელეგრამ არხზე შემოგვიერთდით ტელეგრამზე: https://t.me/SheniEkimi
შენი ქსელი: შენი ექიმი · შენი ამბები
