ინტერიერის დიზაინერ ნინო ძიძაძის ინტერვიუ ჟურნალ “ინტერიერისთვის”
სახლის მეპატრონეები ჩემი ახლო მეგობრები არიან და ეს არ არის ერთადერთი პროექტი, რომელიც მათთვის გამიკეთებია. ვინაიდან კარგად ვიცნობ ოჯახს, მათ ხასიათსა და ცხოვრების წესს, ამ პროექტზე მუშაობა ჩემთვის გამორჩეულად სასიამოვნო აღმოჩნდა.
თავიდანვე შევთანხმდით, რომ სახლი მუქ ტონალობაში უნდა ყოფილიყო. ზოგადად საკმაოდ რთული და სარისკოა მუქ ტონალობაზე მუშაობა, თუმცა თავს ყველაზე კომფორტულად მსგავსი დიზაინის კეთების დროს ვგრძნობ, ბუნებრივი და ხელოვნური განათების სწორად გადათამაშება, მასალა და პროპორციები; უამრავი გამოწვევა მოსდევს მუქ ფერს და მათი გადაწყვეტის გზები საბოლოო შედეგს განსაკუთრებულს ხდის.
სახლში ბევრი საინტერესო დეტალია სპონტანურად გადაწყვეტილი. სამღებრო სამუშაოების დროს სრულიად დაუგეგმავად, ყველანაირი ესკიზის გარეშე მღებავთან ერთად კედლის მოხატვა დავიწყე. მიყვარს როცა პროცესი ასეთი ცოცხალი და დინამიური, ალბათ ამ დროს იქმნება ყველაზე სახასიათო დეტალები დიზაინში.
ოჯახში ორი თაობის წარმომადგენელი ცხოვრობს. ბავშვები ძირითად დროს მეცადინეობაში ატარებენ, მშობლები კი სოციალურად აქტიური პიროვნებები არიან, ამის გამო მათი სახლი მეგობრების ხშირი თავშეყრის ადგილი უნდა ყოფილიყო. ამიტომ საჭირო გახდა დამატებითი სივრცის შექმნა, რომელიც იზოლირებული იქნებოდა ძირითადი საცხოვრებელი ნაწილისგან. სწორედ ამის გათვალისწინებით, ეზოს ერთერთ მონაკვეთში გავაჩინეთ მცირე არქიტექტურული ობიექტი, რომლის სახურავიც გამწვანებულია და ერწყმის ეზოს ტერასულ რელიეფს.
რომ შევაჯამოთ, მიყვარს ისეთ პროექტებზე მუშაობა, სადაც დამკვეთის და ჩემი გემოვნება ემთხვევა ერთმანეთს. ესეთ დროს ბევრი დეტალი და იდეა უშუალოდ სარემონტო სამუშაოების დროს იბადება და მანამდე მკაცრად გაწერილი და ჩაფიქრებული არ არის. შედეგად საბოლოო პროდუქტიც ყოველთვის უნიკალური და საინტერესოა.
ფოტო: გიორგი მამასახლისი
- #gochadze #drpkhakadze #sheniambebi #sheniinterieri
