12/08/2021
ავტორი: ირინა დათაშვილი
პროფესორი, ორგანიზაცია – „აკრედიტაცია საზღვრების გარეშე“ ხელმძვანელი, გიორგი ფხაკაძე აცხადებს:
„1 სექტემბრიდან აუცილებლად უნდა შემოვიღოთ QR პასპორტები ანუ ე.წ. მწვანე საშვები ყველასთვის, ვინც არის აცრილი, ვინც გადაიტანა კოვიდი და ვისაც აქვს 72 საათის განმავლობაში აღებული პისიარ-ტესტი.“
გიორგი ფხაკაძე სრულიად ეთანხმება მოსაზრებას, რომ პისიარ ტესტი არ უნდა ფინანსდებოდეს, თუ ადამიანი აცრაზე უარს ამბობს. ვაქცინა კი უნდა იყოს უფასო.
„სრულიად ვეთანხმები მოსაზრებას, რომ პისიარ ტესტი არ უნდა ფინანსდებოდეს, თუ ადამიანი აცრაზე უარს ამბობს. ვაქცინა კი უნდა იყოს უფასო.
კიდევ ერთი საკითხი – ზოგიერთებმა საველე ჰოსპიტლების თემა წამოწიეს. ქვეყანას არავითარი საველე ჰოსპიტალი არ სჭირდება. საქართველოში 17 000 საწოლია. მათგან 2000 – 3000 ათასს ხელს ვერ მოჰკიდებ, სპეციალიზირებულია, ფსიქიატრიული და ა.შ.. დანარჩენი საწოლები უნდა გამოვიყენოთ. ყველა სამედიცინო დაწესებულება ამ რეჟიმზე უნდა გადავიდეს დაახლოებით 4-6 კვირა.
მე არ ვიცი, რა ხდება მთავრობის შიგნით, მე არ ვარ არც ერთი პოლიტიკური პარტიის წევრი, მაგრამ ახლა დავინახე, რომ საღმა აზრმა გაიმარჯვა, ვთქვათ სიმართლე.
ვინ გაიტანა ეს საღი აზრი?! რასაც ბოლო დღეები ვუყურებ, აშკარად ჯანდაცვის მინისტრის საღმა აზრმა გაიმარჯვა. მოდით, ყველამ გადავდოთ პოლიტიკა და ვაღიაროთ, რომ ჯანდაცვის მინისტრს ეს პოზიცია რამდენიმე ხანია, რაც ჰქონდა, ყველა ეწინააღმდეგებოდა, მაგრამ საბოლოოდ სწორი გადაწყვეტილება იქნა მიღებული.
გავიმეორებ, – დღეს მიიღეს ყველაზე სწორი გადაწყვეტილება, რაც ბოლო პერიოდში მომისმენია ამ გუნდისგან. ამჯერად ეს იყო მეცნიერებაზე, გამოცდილებაზე და საღ გონებაზე აწყობილი გადაწყვეტილება. აქამდე უამრავი შეცდომა იყო დაშვებული. სულ ვამბობდი, რომ თავის შეცდომებზე არ სწავლობენ-თქო. ახლა, ალბათ, დადგა დრო, რომ საბოლოო ჯამში ისწავლეს.
ეტყობა, ძალიან უნდა გაგვიჭირდეს, რომ სწორად მოვიქცეთ. სიტუაცია ეტყობა, გაცილებით მძიმეა, ვიდრე გვეუბნებიან, ამიტომაც მიიღეს ეს გადაწყვეტილება და არა იმიტომ, რომ უხარიათ“, – წერს პროფესორი, ორგანიზაცია – „აკრედიტაცია საზღვრების გარეშე“ ხელმძვანელი, გიორგი ფხაკაძე საქართველოში დაწესებული ახალი შეზღუდვები შესახებ.
უწყებათაშორისმა საკოორდინაციო საბჭომ ახალი შეზღუდვების დაწესების გადაწყვეტილება მიიღო:
„შეიზღუდება მუნიციპალური ტრანსპორტის მოძრაობა. შეზღუდვა არ ეხება საქალაქთაშორისო ტრანსპორტს; სრულად იზღუდება ფესტივალები, გასართობი ღონისძიებები, კონცერტები და სპორტული შეჯიბრებები; იზღუდება ბავშვთა გასართობი ცენტრების მუშაობა. სახელმწიფო უზრუნველყოფს ძირითად ამცრელ დაწესებულებებთან მოსახლეობის რეგულარულ ტრანსპორტირებას.
საკოორდინაციო საბჭოს წევრებს დღევანდელ სხდომაზე დაავადებათა კონტროლის ეროვნული ცენტრის ხელმძღვანელმა მიმართა რეკომენდაციით, სექტემბრიდან, კვების ობიექტებში, სპა სალონებში, ფიტნესცენტრებსა და მსგავსი ტიპის დაწესებულებებში, პირთა დაშვება შესაძლებელი გახდეს ვაქცინით ერთი აცრის ან სრული კურსის, ბოლო 72 საათში ჩატარებული პისიარ ან ბოლო 24 საათში ჩატარებული სწრაფი ანტიგენის ტესტის უარყოფითი პასუხის საფუძველზე. საბჭო აღნიშნულ საკითხზე იმსჯელებს და მიღებული გადაწყვეტილებების შესახებ საზოგადოებას ეცნობება.
კვების ობიექტების მუშაობა, ნაცვლად ღამის 00:00 საათისა, დასაშვები იქნება 23:00 საათამდე. საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მივმართავთ კერძო სექტორს”.
Professor Giorgi Pkhakadze, MD, MPH, PhD
#drpkhakadze#accreditationge#გიორგიფხაკაძე
Профессор Гиорги Пхакадзе. #ПрофессорПхакадзе
