ჭინჭარი, ალბათ, ერთ-ერთი ის მცენარეა, რომელიც თავისი სუსხიანობის გამო არავის უყვარს. მისგან დასუსხული კანი ბევრისთვის ბავშვობის ცუდ მოგონებებთანაც კი ასოცირდება. მაგრამ, ალბათ, ბევრმა არც იცის, რომ ჭინჭარი არაერთ სასარგებლო თვისებას შეიცავს და მას მთელს მსოფლიოში სხვადასხვა სახით ამზადებენ. საქართველოში ყველაზე გავრცელებულად ჭინჭარს კახეთში, კონკრეტულად კი ქიზიყში ამზადებენ. ის აქ გაზაფხულის და ზაფხულის სუფრის განუყოფელი კერძია.
მისი მომზადება კი საკმაოდ მარტივია და, რაც მთავარია, ძალიან ცოტა დრო სჭირდება. ჭინჭრის მომზადების რეცეპტი ასეთია: გარეცხვის შემდეგ, ქორფა ჭინჭრის ღეროებს მოვაცილოთ დიდი ფოთლები და ისე მოვხარშოთ. ამისთვის სულ 10-15 წუთია საჭირო. უკვე მოხარშული ჭინჭარი კარგად უნდა გადავწუროთ და მხოლოდ ამის შემდეგ შევანელოთ. უნდა მოვაყაროთ წვრილად დაჭრილი ქინძი, ახალი ნიორი და ბოლოს მოვასხათ კახური ზეთი, მარილი გემოვნებით. ხშირად ჭინჭრის ნახარშში შოთის პურსაც ხარშავენ და ანალოგიურად ანელებენ.
როგორც ამბობენ, ასეთი და მისი მსგავსი კერძების რეცეპტები ასობით წელს ითვლის და, შესაძლოა, შუა საუკუნეების დროიდანაც კი ამზადებენ ჩვენს ქვეყანაში.
ავტორი: გიორგი პაპუაშვილი
