საცივზე, რომელიც ქართული სადღესასწაულო სუფრის გვირგვინად მიიჩნევა, ამბობენ, რომ ინდური ფესვები აქვს და მას ხშირად ადარებენ ინდურ კერძს, რომელსაც კარი ჰქვია.
მასში სუნელების დიდი რაოდენობაა, მაგრამ სრულიად უცხოა ამ კერძისათვის ნიგოზი. მხოლოდ იშვიათ შემთხვევაში თუ შეხვდებით კარის ისეთ ვარიანტს, რომელშიც ნუში იქნება გამოყენებული. მის შემადგენლობაში შედის ქოქოსის რძე, ნაღები, ქათმის ხორცი და უამრავი სანელებელი.
უნდა აღინიშნოს, რომ ინდურ სამზარეულოში სუნელები ჯერ იხალება ცხიმთან ერთად და შემდეგ გამოიყენება კერძში. მიაჩნიათ, რომ სუნელი მხოლოდ ასე ხსნის თავის არომატულ თაიგულს.
ნიგვზისა და თხილეულის გამოყენება ხორციან კერძებში პოპულარული იყო სასანიდურ სპარსეთში. სპარსელებისგან არაბებმა, მანამდე კი ძველმა რომაელებმა ისწავლეს ტკბილი და ნუგბარი კერძების გასქელება დაფხვნილი ნუშითა და ნიგვზით. სპარსელებმა, ისევე როგორც არაბებმა, ხორციანი კერძების რეცეპტები კავკასიელებისგან შეითვისეს.
მექსიკაში არსებობს კერძი – ინდაურის მოლე, რომელიც ასევე შეიძლება საცივის შორეულ ნათესავად ჩაითვალოს.მოლეში ქინძთან და წითელ წიწაკასთან ერთად ნუშს იყენებენ, მაგრამ ის, რაც მას სრულიად უნიკალურ გემოს აძლევს, შოკოლადია, რომლის სამშობლოც მექსიკაა.
საქართველოს თითოეული კუთხე აცხადებს პრეტენზიას, რომ საცივი სწორედ მისი ტრადიციული კერძია. ასე რომ, ძნელია საცივის პირველწყაროს მიგნება.
გთავაზობთ საცივის ყველაზე გავრცელებულ რეცეპტს:
მასალა:
საშუალო ზომის ინდაური
ნიგოზი – 1 კგ
ხახვი – 400 გ
უცხო სუნელი – 1 ს.კ.
ყვითელი ყვავილი – 2 ს.კ.
მიხაკი – 1 ჩ.კ.
დარიჩინი – 1 ჩ.კ.
ყვითელი კოჭა – 0.5 ჩ.კ.
ხმელი ქინძი – 0.5 ჩ.კ.
ნიორი – 2 კბილი
ძმარი, მარილი და წითელი წიწაკა – გემოვნებით
მომზადება: მოვხარშოთ ინდაური. მოვაყაროთ მარილი და შევბრაწოთ ღუმელში. ბულიონს მოვხადოთ ცხიმი და მასში მოვშუშოთ წვრილად დაჭრილი ხახვი. ნიგოზი ორჯერ გავატაროთ ხორცსაკეპ მანქანაში. ავურიოთ დაფქული სუნელები, დაჭყლეტილი ნიორი და ხელით ვზილოთ, სანამ ზეთი არ გამოუვა. ზეთი გადავწუროთ ცალკე ჭურჭელში. ნიგვზის მასას შევურიოთ მოშუშული ხახვი, ცოტა ბულიონი და ერთგვაროვან მასად ვაქციოთ. მომზადებული ნიგოზი გავხსნათ ინდაურის იმდენ ბულიონში, რომ მივიღოთ თხელი არაჟნის კონსისტენციის მასა. შევაზავოთ მარილითა და წიწაკით.
მომზადებული საცივის წვენი ქვაბში ჩავასხათ და ჩავაწყოთ ინდაურის ნაჭრები. დავდგათ ნელ ცეცხლზე და ვადუღოთ 5 წუთი, თან ვურიოთ. შეგრილებულს შევურიოთ ძმარი. სუფრასთან მიტანის წინ მოვასხათ ნიგვზის ზეთი.
გაეცანი საქართველოში პირველ შემეცნებით-კულინარიულ პლატფორმას…
#drpkhakadze #გიორგიფხაკაძე #sheniekimi #shenisofeli #shenisupra #sheniambebi #sheniinterieri #shenihoroskopi #sheniganatleba #accreditationge #shenidasveneba #gochadze @shenisupra @drpkhakadze
