ჩვენს ირგვლივ მრავალი პროფესიის ადამიანია და რა თქმა უნდა, თითოეული მათგანი ძალიან დასაფასებელია, რადგან ეს ადამიანები უამრავ რესურსს დებენ თავიანთ საქმეში. მეტად რთულ და შარომატევად საქმეებზე როცა ვსაუბრობთ, ალბათ, ყველას მომსახურეობის სფერო გვახსენდება, რომელის ძირიადი ნაწილი მიმტანებზე დგას…
Shenisupra.ge გთავაზობთ ინტერვიუს გიორგი ვაჩნაძესთან, რომელიც წლებია, ამ სფეროში მუშაობს და მიმტანების რეალურ ცხოვრებაზე, მიღწევებსა და გამოწვევებზე გვესაუბრება:
- გიორგი, რა ასაკში დაიწყეთ მიმტანად მუშაობა და რამ გიბიძგათ, რომ ეს ნაბიჯი გადაგედგათ?
- 10 წელია, უკვე ამ სფეროში ვარ… მიმტანად მუშაობა 14 წლის ასაკში დავიწყე, ამის მიზეზი ფინანსური მდგომარეობა იყო…
- სამსახურის პირველი დღეები რომ გაიხსენოთ, რამდენად ლოიალურები იყვნენ ობიექტის თანამშრომლები და უფროსები?
- სხვათა შორის, ყველასთან კარგი ურთიერთობა მქონდა, ლოიალურებიც იყვნენ, თუმცა, სამწუხაროდ, პირველ დღეებში მხოლოდ ეს არ იყო საკმარისი, მოგეხსენებათ ხალხმრავალ ადგილას მუშაობა არ არის მარტივი…
- 14 წელი საკმაოდ პატარა ასაკია… მაინტერესებს, გაგიჭირდათ თუ არა ამ საქმეში ჩაბმა და ამ ყველაფრის სამსახურად აღქმა?
- სიმართლე გითხრათ, არ გამჭირვებია, უბრალოდ, პირველი ორი-სამი დღე იყო ცოტა რთული, თუმცა შემდეგ შევეჩვიე და იმ დროს ძალიან მიხაროდა, რომ ვმუშაობდი და საკუთარი შრომით გამოვიმუშვებდი თანხას.
- ახლანდელ რეალობაზე რას გვეტყვით? ყველასთვის, ცნობილია, რომ ეს საქმე სირთულეებთანაა დაკავშირებული…
- კონკრეტული ფაქტი არ მახსენდება, თუმცა ამ სფეროში უამრავი სირთულე იქმნება ყოველდღიურად, რომელიც თითქოს შეუმჩნეველია… როგორც უკვე აღვნიშნე, ხალხმრავალ ადგილას უამრავი პრობლემა იქმნება…
- მომხმარებლებს როგორი დამოკიდებულება აქვთ თქვენდამი – როგორია ტენდენცია?
- რესტორანში ბევრი კატეგორიის ადამიანს ვხვდები და მათგან, საბედნიეროდ, უფრო მეტი დადებითად არის განწყობილი და ძალიან კარგი კომუნიკაცია გვაქვს, თუმცა ზოგჯერ პირიქითაც ხდება, სამწუხაროდ…
- ალბათ, მეთანხმებით, რომ თითქმის ყველა პროფესია დღემდე რაღაც სტერეოტიპებთან და სტიგმებთან ასოცირდება, მათ შორისაა, მიმტანობაც. მაინტერესებს, თქვენ რას ფიქრობთ ამ საკითხთან დაკავშირებით?
- კი ბატონო, რაღაც სტიგმები და სტერეოტიპები დღემდე არსებობს, თუმცა მე აბსოლუტურად არ ვეთანხმები ამ ყოველივეს.
- რამდენად მოგწონთ და გიყვართ ეს საქმე?
- სიმართლე გითხრათ, ხალხთან ურთიერთობა მიყვარს და მომწონს ძალიან… ზუსტად ესაა მიზეზი, თუ რატომაც ვმუშაობ ამ სფეროში, თუმცა თავად მიმტანობა, როგორც სფერო, იმდენად რთული და დამღლელია, სამწუხაროდ, საერთოდ არ მიყვარს…
- დაბოლოს, მაინტერესებს რას ურჩევთ იმ ახალგაზრდებს, რომლებიც ახლა გადიან იმ პერიოდს, რაც თქვენ 10 წლის წინ გაიარეთ?
- რჩევებსა და შენიშვნებს ვერ მივცემდი… მე პირადად, რჩევებს მივცემდი დამსაქმლებლებს. მათ ვეტყოდი, რომ უფრო მეტად შეუწყონ ახალგაზრდებს ხელი, რათა შეუყვარდეთ ეს საქმე და უხაროდეთ სამსახურში სიარული. დამსაქმებლის ხელშეწყობაზე ბევრი რამაა დამოკიდებული. მე თავადაც მქონია კარგი სამსახური, კარგი ანაზღაურებით, თუმცა ხელშეწყობა არ მქონდა და, შესაბამისად, სურვილი და მოტივაციაც დამკარგვია…
ავტორი: მაგდა ალანია
