ინდაურს გემრიელი და საკმაოდ რბილი ხორცი აქვს. აღსანიშნავია, რომ თუ ქათმებში გემოთი მამალს დედალი სჯობს, ინდაურებში პირიქით, მამალ ინდაურს ბევრი უპირატესობა აქვს დედალთან შედარებით. მამალი ინდაურის ხორცი უფრო რბილი და მსუქანია, ზომითაც და წონითაც იგი უფრო დიდია და ხორციც ბევრად უფრო გემრიელი აქვს. საქართველოში ინდაური უფრო საცივად არის მიღებული. სხვა ქვეყნებში კი მრავალი სახის კერძს ამზადებენ მისგან. უფრო მიღებულია შემწვარი ან მოხარშული საწებლით ან სატენით.
ინდაურის საცივი (პირველი ვარიანტი ) იმერულად
მასალად საჭიროა:
ინდაური 1 ცალი
ხახვი 400 გ.
ხმელი ქინძი 1 ს/კ.
ხმელი უცხო სუნელი 1 ს/კ.
ნიორი 1 თავი
წიწაკა, მარილი, დარიჩინი, ძმარი გემოვნებით
ზაფრანა 1 ს/კ.
კვერცხი 2 ცალი
ნიგოზი 400-500 გ.
მომზადება:
კარგად გარეცხილი მსუქანი ინდაური ჩავდოთ დიდი ზომის ქვაბში, დავასხათ ცივი წყალი იმდენი, რომ ინდაურს ფარავდეს. დაახლოებით 40 წუთის ხარშვის შემდეგ ამოვიღოთ ნახარშიდან, მოვაყაროთ მარილი გარედან და შიგნიდან. ჯერ კიდვ ცხელი ინდაური წამოვაგოთ შამფურზე და შევწვათ. შეწვა გრძელდება კანის შეწითლებამდე.
შემწვარი ინდაური გადავიტანოთ ლანგარზე. მის ნახარშს მოვხადოთ ცხიმი და მასში მოვშუშოთ 400 გრამი ძალიან წვრილად დაჭრილი ხახვი. მოშუშულ ხახვს დავასხათ ნახარში და დავდგათ ცეცხლზე და ვადუღოთ 10-15 წუთი. ნიგოზი გავატაროთ ორჯერ ხორცსაკეპ მანქანაში, დავამატოთ სანელებლები და შევურიოთ ბულიონში. ვადუღოთ 20 წუთი. გადმოვდგათ, შევაციოთ და შევურიოთ კარგად გათქვეფილი 2 ცალი კვერცხის გული და თან განუწყვეტლად ვურიოთ, რომ კვერცხი არ აიჭრას. შემწვარი ინდაური დავჭრათ საშუალო ზომის ნაჭრებად, ჩავაწყოთ საცივისთვის განკუთვნილ ჭურჭელში და დავასხათ საცივის საწებელი, რომელიც ჯერ კიდევ თბილი იქნება.
ინდაურის საცივი
(მეორე ვარიანტი)აჭარულად
მასალად საჭიროა:
ინდაური
ხახვი – 400 გრამი
ნიგოზი – 4 ჩაის ჭიქა
კვერცხი – 3 ცალი
ნიორი, წიწაკა, ხმელი სუნელი, მარილი – გემოვნებით
მომზადება:
გასუფთავებული, გარეცხილი ინდაური მოვათავსოთ ქვაბში და მთლიანად მოვხარშოთ. ნახარშს მოვხადოთ ცხიმი და ამ ცხიმში მოვშუშოთ წვრილად დაჭრილი ხახვი. ცალკე დავნაყოთ ნიგოზი, ჩავალესოთ კვერცხის გული (ვლესოთ კარგა ხანს). შემდეგ ამაშივე ავურიოთ კარგად დანაყილი ხმელი სუნელი, ნიორი, წიწაკა და გავხსნათ ინდაურის ნახარშში. მოხარშულ ინდაურს მოვაყაროთ მარილი, გავაცივოთ, დავჭრათ და მოვასხათ გამზადებული, გაციებული წვენი.
ინდაურის საცივი
(მესამე ვარიანტი) გურულად
მასალად დაგჭირდებათ:
1 ინდაური,
½ ჩაის ჭიქა ძმარი,
200 გრ. ნიგოზი,
2-3 თავი ხახვი,
1 კბილი ნიორი,
1 ძირი ქინძი,
½ ჩაის კოვზი დარიჩინი,
3-4 მარცვალი მიხაკი,
წიწაკა და მარილი – გემოვნებით.
მომზადება:
გასუფთავებულ და გარეცხილ ინდაურს მოაყარეთ მარილი და შეწვით ღუმელში. ინდაურის თავ–ფეხი და კუჭ–ღვიძლი ცალკე ქვაბში ჩააწყეთ, დაასხით წყალი და მოხარშეთ.
ამ წვენიდან აიღეთ 3 ჩაის ჭიქა, აურიეთ შიგ ნახევარი ჩაის ჭიქა ძმარი, აადუღეთ, მერე მიუმატეთ დანაყილი ნიგოზი, დაკეპილი ხახვი, დანაყილი ქინძი, ნიორი, დარიჩინი, წიწაკა, მიხაკი, ერთად კარგად აურიეთ და აადუღეთ.
შემწვარი ინდაური დაჭერით ნაჭრებად, ჩააწყეთ ჭურჭელში, დაასხით ზედ მომზადებული ცხელი წვენი, დაახურეთ სახურავი, გააცივეთ და ისე მიიტანეთ მაგიდაზე.
შენი ქსელი: შენი ექიმი · შენი ამბები
